Cristiano Ronaldo er fyribils leikbannaður, eftir at hann fór úr leguni hjá portugisiska landsliðnum í Keypmannahavn.

Aganevndin hjá portugisiska fótbóltssambandinum hevur reist mál móti stjørnuni. Tað upplýsir sambandið í eini fráboðan, sambært portugisiska miðlinum A Bola.

Í fráboðanini stendur, at Ronaldo er fyribils leikbannaður, meðan málið verður viðgjørt, og at talan er um eitt skundmál.

Fyrr í vikuni bað 41 ára gamli áleyparin um umbering fyri brádliga at vera farin úr landsliðsleguni.

– Eg átti ikki at hava gjørt tað. Ábyrgdin er bara mín, segði hann.

Sambært Ronaldo hevði landsliðsvenjarin, Jorge Jesus, brotið eina avtalu við hann. Dagarnar eftir hendingina viðgekk áleyparin tó, at hann hevði tikið ov rívan til.

Ronaldo fór úr leguni stutt undan dystinum hjá Portugal móti Danmark í Nations League. Hetta var triði dysturin hjá Portugal í bólkaspælinum.

Hann hevur greitt frá, at undan landsliðssavningini var avtalað, at hann skuldi spæla fyrsta og síðsta av teimum fýra dystunum, sum Portugal hevði fyri framman. Talan var um heimadystirnar móti Wales og Noregi.

Ronaldo spældi sum ætlað móti Wales. Sambært honum spurdi landsliðsvenjarin síðani, um hann eisini kundi spæla ein hálvan tíma móti Noregi.

Tað játtaði Ronaldo. Hann hitaði upp í seinna hálvleiki, men varð ongantíð settur á vøllin.

Sambært Ronaldo avtalaðu teir báðir síðani, at landsliðsvenjarin skuldi greiða frá gongdini á tíðindafundinum undan dystinum móti Danmark.

Tað gjørdi venjarin tó ikki, sigur Ronaldo, og tí valdi hann at fara úr landsliðsleguni.

Cristiano Ronaldo hevur spælt 234 landsdystir fyri Portugal og skotið 146 mál. Hann hevur áður spælt við millum annað Real Madrid og Manchester United og spælir nú við saudiarabiska felagnum Al-Nassr.

/ritzau/