Tað heldur landsstýrismaðurin í lógarmálum, Bjarni Kárason Petersen.
– Í staðin fyri vakmyndatól kundu vit havt fleiri løgreglufólk í náttarlívinum og loyvt skeinki­støðunum at havt longri opið.
Tað sigur sigur landsstýrismaðurin í lógarmálum, Bjarni Kárason Petersen, í samrøðu við Sosialin.
Løgtingið hevur samtykt eitt uppskot til samtyktar um at seta upp vakmyndatól. Spurdur um hesa samtykt, svarar landsstýrismaðurin soleiðis:
– Eg taki samtyktina hjá løgtinginum til eftirtektar, men hetta er ikki eitt mál, sum er frammarliga í røðini hjá okkum í Løgmálaráðnum. Vit hava nógv mál á skránni – millum annað alt, sum hevur við útlendingamál at gera – so hetta hevur ikki høga raðfesting beint nú.
Landsstýrismaðurin sigur, at ein heimild at seta vakmyndatól upp átti at verið givin í eini royndarskipan, og ikki sum ein standandi heimild. So kundi ein eftirmeting verið gjørd, har staðfest verður, um fyrimunirnir standa mát við inntrivið í privatlívið.
Sosialurin hevur eisini spurt landsstýrismannin í lógarmálum, hvat hann sigur til ynskið hjá LGBT+ um at fáa málið á breddan. Men ongar ítøkiligar ætlanir eru um tað. 
Á Faroe Pride 2024 var eitt av slagorðunum: “Hvat vilja vit hava? Løgfrøðiligt kynsskifti!” Esther Margreth Petersen, samskipari hjá LGBT+ Føroyum segði eisini við in.fo, at eitt av málunum, felagsskapurin fegin vil varpa ljós á, er løgfrøðiligt kynsskifti.
Bjarni Kárason Petersen sigur við Sosialin, at hetta hevur týdning fyri summi, men heldur kortini ikki málið vera búgvið, og hann hevur sum er ongar ætlanir um at fara undir at loyva løgfrøðiligum kynsskifti.
Sosialurin fæst í leysasølu kring landið. Haldarar kunnu lesa blaðið á sos.fo