Tað er í brasilsku statinum Rio Grande do Sul, at Jacuí-áin er farin upp um áarbakkarnar eftir fleiri dagar við ringum veðri. Hús eru skadd, og bjargingartænastur eru sendar út til tey øki, sum eru rakt.

Nýggja myndarøðin hjá evropeisku Copernicus-skipanini vísir flóðina frá trimum ymiskum Sentinel-fylgisveinum yvir fleiri dagar.

Ein Sentinel-2 mynd frá 3. oktober vísir flóðavatnið sum myrkablá øki fram við ánni og út yvir láglendi. Dagin eftir, 4. oktober, varð økið myndað við radara frá Sentinel-1, har vatnflóðirnar síggjast sum reyð øki. Ein Sentinel-3 mynd frá 7. oktober vísir, at stór vatnøki framvegis vóru eftir fleiri dagar seinni.

Saman vísa myndirnar, hvussu ymiskir fylgisveinar kunnu fylgja somu náttúruvanlukku á ymiskan hátt og geva myndugleikunum eitt neyvari yvirlit yvir, hvussu støðan broytist.

Copernicus vísir á, at dátur frá Sentinel-fylgisveinunum kunnu brúkast til at kortleggja flóðir, staðfesta hvørji øki eru rakt og stuðla bjargingararbeiði og fyribyrging.