Fólk, sum forvinna høga inntøku á fiskavirkjum í ávísum tíðarskeiðum, skulu møguliga missa rættin til útgjald úr fiskavirkisskipanini, tá lítið arbeiði er.

Tað heldur Margit Stórá, landsstýriskvinna í almannamálum, sum ætlar at taka spurningin upp við stýrið fyri ALS.

Í einum svari til Liljuna Weihe, løgtingskvinnu, vísir landsstýriskvinnan á, at starvsfólk á uppsjóvarvirkjum og í fiskamjølframleiðsluni kunnu forvinna tað, sum svarar til eina miðalársløn, við at arbeiða styttri enn eitt ár.

Hon setur tí spurnartekin við, um tað er rímiligt, at tey eisini fáa útgjald úr fiskavirkisskipanini, tá lítið ella einki er at gera á virkinum.

Ein møguleiki er sambært landsstýriskvinnuni at seta eitt inntøkumark. Hava starvsfólk forvunnið meira enn eina ávísa upphædd á fiskavirkinum, skulu tey møguliga ikki hava rætt til stuðul úr skipanini afturat. Hon nevnir tó onga ítøkiliga upphædd.

Margit Stórá heldur eisini, at munur eigur at verða gjørdur á virkjum eftir, hvussu væl tey kunnu leggja arbeiðið til rættis.

Hon vísir á, at framleiðslan á kryvjivirkjum í alivinnuni ikki er tongd at veiðini hjá fiskiskipum og í stóran mun verður løgd til rættis langt fram í tíð. Á øðrum fiskavirkjum er arbeiðið hinvegin treytað av skiftandi tilgongd av rávøru.

Upprunaliga skuldi fiskavirkisskipanin tryggja fólki á slíkum virkjum eina rímiliga inntøku. Landsstýriskvinnan viðurkennir eisini, at skipanin er avgerandi fyri, at summi fiskavirki kunnu bera seg.

Samstundis heldur hon tað vera ein trupulleika, at nógv fólk fáa útgjald úr skipanini, meðan arbeiðsloysið er lágt og tørvur er á arbeiðsmegi aðrastaðni.

Sambært tølunum í svarinum vórðu 17,12 milliónir krónur útgoldnar úr fiskavirkisskipanini í 2024 og 16,83 milliónir í 2025.

Enn er eingin broyting samtykt. Margit Stórá upplýsir, at ALS-stýrið skal taka undir við ásetingunum, um broytingar skulu gerast í kunngerðunum við heimild í ALS-lógini.