Klokkan 15 verður fyrsta bríksl á Tórsvølli, tá ið Føroyar og Moldova fara at spæla um, hvat av hesum báðum í mars fær møguleikan í tveimum dystum at spæla um pláss í B deildini í Nations League.
Føroysk fótbóltssøga verður skrivað í dag, tí hetta er fyrsta ferðin, at Føroyar spæla fótbóltslandsdyst í Føroyum í november.
Føroyar hava frammanundan spælt 24 fótbóltslandsdystir í november. Teir hava allir verið spældir aðrastaðni enn í Føroyum. Føroyar hava tapt 16 ferðir, fimm ferðir er tað endað javnt, og Føroyar hava vunnið tríggjar ferðir.
Teir báðir fyrstu vóru, tá ið Allan Simonsen var landsliðsvenjari, og tá gekk ikki væl.
Føroyar taptu 5-0 í Finnlandi 16. november í 1994. Støðan var 1-0, tá ið Tummas Eli Hansen í 51. minutti sá heinleiðis reytt kort, og so skrædnaði tað. Millum málskjúttarnar var Jari Litmanen, sum skoraði tvey mál.
Føroyar taptu 5-0 ímóti Grikkalandi 15. november í 1995. Tá var tað málleyst, inntil heimaliðið í 59. minutti legði seg á odda, og so skrædnaði tað.
Besta føroyska avrikið í november var júst ímóti Grikkalandi, tá ið Føroyar í EM undankappingardysti fríggjadagin 14. november í 2014 vunnu 1-0 í Piraeus í Grikkalandi. Sambært FaroeSoccer vóru tað 16821 eygnavitni, tá ið Jóan Símun Edmundsson skoraði málið, sum vísti seg at vera sigursmálið. Tveir spælarar, sum framvegis eru á landsliðnum, vóru við ta ferðina. Viljormur Davdisen var alla tíðina á vøllinum, og fýra minuttir undan dystarloki varð Odmar Færø skiftur inn.
Tá ið Føroyar 21. november í 2007 í Modena í Italia spældu EM kappingarundandyst, sá tað einki serligt út, tá ið tað var hálvleikt, og heimaliðið var frammanfyri 3-0. Tað vóru fleiri vikur síðani, at føroyingarnir høvdu verið í kappingardysti, men kortini gekk tað fínt í seinna hálvleiki, sum Føroyar vunnu 1-0. Føroyskur málskjútti var Rógvi Jacobsen, sum í 83. minutti minkaði um munin til 3-1.
Umframt á útvølli ímóti Grikkalandi hava Føroyar í november vunnið tvær aðrar ferðir í november. Í báðum dystunum hevur Eyðun Klakstein verið venjari. 14. november í 2024 vunnu Føroyar 1-0 í Nations League dysti í Armenia. Viljormur Davidsen skoraði við brotssparki, og fyri einum ári síðani – 18. november í 2025 – endaði vindardystur í Kroatia ímóti Kasakstan 1-0. Sigursmálið skoraði Petur Knudsen í 25. minutti.