Ukrainski forsetin, Volodymyr Zelenskyj, segði á tíðindafundi í Noregi seinnapartin í dag, at Noreg er eitt av londunum, sum hevur stuðlað Ukraina best, síðan Russland leyp á í februar í 2022.
- Noreg hevur hjálpt okkum at verja lív og varðveita menniskju.
Forsetin segði, at Ukraina ynskir, at kríggið endar so skjótt sum gjørligt, og hann segði eisini, at undir vitjanini í Noregi í dag hevur eisini verið tosað um, hvat verður týdningarmikið, tá kríggið einferð endar.
Vitjanin í Noregi í dag, har samráðingar hava verið millum ríkisleiðarar og serliga sendimannin hjá USA, er hin fimmta hjá ukrainska forsetanum síðan russisku innrásina.
- Vit tapa ikki hetta kríggið, men vit missa fólk og tíð, segði Volodymyr Zelenskyj á tíðindafundinum.
Fundirnir, sum hava verið í norska høvuðsstaðnum Oslo í dag, eru í einari tíð, har kalt er millum amerikanska forsetan, Donald Trump, og ukrainska forsetan, nú USA hevur gjørt av at keypa nógva olju úr Russlandi.
Úr Noregi fer serligi sendimaðurin hjá USA til Moskva at hitta russiska forsetan, Vladimir Putin, í royndini at fáa í lag eina friðaravtalu millum Russland og Ukraina.
