Jón Klein Olsen hjá Føroya Politi er nú komin við einari dagføring um hendingina, tá frystilínuskipið Kambur í morgun fekk ein sjógv og fekk stóra slagsíðu.
- Hendingin fór fram um 07.45-tíðina í morgun. Skiparin, sum ringdi 112 og bað um hjálp, segði, at skipið hevði lagt seg á aðra síðuna.
Tá Kambur fekk sjógvin, vóru teir staddir einar 17 fjórðingar í ein útsynning úr Akrabyrgi. Aldan var seks metrar høg, og vindurin var um 12 metrar um sekundið.
- Tá tyrlan hevði tikið teir fyrstu 13 menninar upp av skipssíðuni, var hon full. Tá var ein maður eftir á skipssíðuni, sum teir sóu. Tyrlan fleyg menninar á Suðuroyar Sjúkrahús.
Jón Klein Olsen sigur, at tá tyrlan kom út aftur á leiðina, vóru umstøðurnar sera truplar, og tað tók sína tíð at fáa bjargað hesum seinasta, sum teir tá sóu á skipssíðuni.
Nú verður leitað eftir teimum tveimum seinastu av manningini á Kambi, sum taldi 16, og øll vóna, at tað fer at eydnast at finna menninar. Brimil skipar leitingina.
- Eg veit ikki akkurát, nær Kambur sakk, men hann var í øllum førum sokkin klokkan 10.30. Tá var hann rikin einar fimm fjórðingar longur suður enn har, hann fekk sjógvin fyrr um morgunin.
Jón Klein Olsen sigur, at løgreglan í morgun hevur arbeitt við at fáa fatur í øllum teimum avvarðandi, bæði hjá teimum bjargaðu og avvarðandi hjá teimum, sum enn ikki eru komnir afturíaftur.
- Øll tey avvarðandi hava nú fingið boðini, leggur hann aftrat.
