Magnus Árason gjørdi veruliga vart við seg, tá hann og liðfelagarnir í Mors-Thy í dysti í bestu donsku hondbóltsdeildini vunnu 29-27 á Fredericia í Middelfart Sparekasse høllini. Í steðginum var Fredericia á odda 16-14.

Magnus skoraði seks mál upp á 10 málroyndir, og var toppskjútti hjá Mors-Thy. Í tveimum førum vann Magnus bóltin frá mótstøðuliðnum, tá Fredericia var í álopsstøðu.

Mors-Thy er nummar 11 í deildini við átta stigum.

Teis Horn Rasmussen og liðfelagarnir í TTH Holstebro vunnu á heimavølli stórsigur 43-30 á liðnum hjá Paula H. Rasmussen og Jákupi Egholm, TMS Ringsted. Í steðginum var Holstebro á odda 23-16.

Teis var effektivur. Hann skoraði fýra mál upp á fýra málroyndir, og hann vann eisini liðnum tvey brotskøst.

Holstebro er nummar 10 í deildini við níggju stigum. Ringsted er næstaftast við trimum stigum.

Jóhan á Plógv Hansen og liðfelagarnir í Skanderborg-Aarhus taptu á heimavølli 32-35 (13-18) fyri Sønderjyske.

Jóhan skoraði fimm mál upp á sjey málroyndir.

Skanderborg-Aarhus er nummar átta í deildini við 14 stigum.