Magnus Powell fer ein av komandi døgunum at skriva undir sáttmála við Østersunds FK í Svøríki og heldur sostatt ikki fram í 07 Vestur, boðar felagið frá. Magnus Powell hevði ikki starv í øðrum felagi, tá hann í juni 2021 kom til 07 Vestur, eftir at Heðin Askham legði frá sær. Seinasta felagið hann vandi var Levanger í 3. bestu deidini í Norra.
- Tað var skjótt eyðsæð at Magnus var eitt slag av venjara, vit ongantíð áður hava sæð í felagnum. Hann hevur meir enn nakar flutt felagið nøkur risafet á tí ítróttarliga økinum, eins og hann hevur verið ein hollur stuðul hjá umsitingini í teirra arbeiðið, hesa stuttu tíðina hann var í felagnum, skrivar 07 Vestur á heimasíðuni, og leggur afturat:
- Tað sum Magnus leggur eftir seg er ein vitan um hvat krevst at flyta felagið longur framá í føroyskum fótbólti. 07 Vestur leitar nú eftir nýggjum venjara, ið kann taka staffettina upp eftir Magnus. Hóast vit eru hørm um, at Magnus fer til annað felag, so taka vit tað sum eitt herðaklapp at Østersunds FK hevur lagt til merkis hvat Magnus Powell og 07 Vestur hava avrikað í 2021. 07 Vestur takkar Magnusi fyri tíðina og vilja vit ynskja honum bestu eydnu í Østersunds FK, skrivar 07 Vestur.
Sostatt skal 07 Vestur hava nýggjan venjara til komandi kappingarár. Felagið hevur fingið tilgongd av millum annað Ronni Møller-Iversen og Jasper Van Der Heyden.
