Tað var við fløggum og sangi, at meira enn 750 danskir fótbóltsfjepparar komu til norska høvuðsstaðin við Osloferjuni hósmorgunin.

»Vi er danskerne« og »Vi elsker Danmark« ljóðaði av skipinum, tá tað kom inn á Oslofjørðin. Á ovasta dekki veittraðu donsk fløgg.

Myndirnar mintu um oktober 1985, tá ferjan kom aftur til Keypmannahavnar eftir danska 5-1-sigurin á Noregi í HM-undankappingini í Oslo.

So nógv stendur ikki upp á spæl hesaferð. Noreg og Danmark hittast í kvøld í fyrsta dystinum í bólkaspælinum í Nations League.

Riemer lovar at geva nakað aftur

Danski landsliðsvenjarin, Brian Riemer, nevndi longu á tíðindafundinum mikudagin stuðulin frá fjepparunum sum eina eyka drívmegi hjá liðnum.

– Tá Osloferjan mikudagin seinnapart fór úr Keypmannahavn í reyðum og hvítum, vakti tað nógva søgu og nógv minni – í øllum førum hjá mær – sum gleddu mítt landsliðshjarta, segði hann.

Hann lovaði, at spælararnir fara at gera sítt ítasta fyri at løna fjepparunum stuðulin aftur.

– Tað hevur stóran týdning fyri hetta lutfalsliga unga liðið at vita, at hesin stuðulin er har fyri okkum, segði Brian Riemer.

Á bryggjuni í Oslo tók sangurin »En for alle« hjá Rocazino ímóti fjepparunum úr einum hátalara.

/ritzau/