Seint í gjárkvøldið var greitt, at kinesiski forsetin, Xi Jinping, var lendur í USA, nú hann og amerikanski forsetin, Donald Trump, skulu hittast á týdningarmiklum toppfundi.
Norska kringvarpið - NRK - veit at siga, at Donald Trump tók ímóti kinesiska leiðaranum á flogvøllinum uttanfyri Washington, og sagt verður, at tað er rættilga óvanligt av einum amerikanskum forseta.
Kinesiski forsetin verður á almennari vitjan í USA í tríggjar dagar, og hetta er samstundis, sum heimsins leiðarar eru á ST-aðalfundi í New York.
Sambært CNN er avtalað, at Xi Jinping og Donald Trump skulu fundast í dag og fríggjadagin, og leiðararnir fara eitt nú at tosa um handil og vitlíki, verður sagt.
Útlendskir miðlar vita at siga, at hetta er fyrsta vitjanin hjá kinesiska forsetanum í amerikanska høvuðsstaðnum í tíggju ár.
Stutt eftir, at Xi Jinping varð lendur, kunngjørdi amerikanski fíggjarmálaráðharrin, at stórveldini - USA og Kina - vóru samd um at leingja steðgin í handilskrígnum millum londini.
