Merkið á donskum hernaðarbúnum er nú evnið í einum skrivligum fyrispurningi til løgmann.
Bjarni Kárason Petersen, løgtingsmaður, hevur sett Beini Johannesen, løgmanni, tríggjar spurningar um føroyska flaggið og nýtsluna av tí hjá donsku verjuni.
Hann vil vita, um nýtslan er í samsvari við flagglógina, og um landsstýrið varð kunnað, tá danska verjan tók avgerð um at nýta Merkið á búnunum.
Harumframt spyr hann, um løgmaður heldur tað vera í lagi, at danska verjan nýtir Merkið til at umboða danskt hernaðarvald.
Vil hava føroyskar myndugleikar við upp á ráð
Í viðmerkingunum vísir Bjarni Kárason Petersen á, at danskar hernaðareindir, eitt nú Arktisk Kommando, seinastu árini eru farnar at nýta Merkið á búnunum saman við Dannebrog og grønlendska flagginum, Erfalasorput.
Hann vísir til Fámjinsskjalið, har ásett er, at Føroyar skulu takast við upp á ráð og hava samávirkan í uttanríkis- og trygdarpolitiskum spurningum, sum hava týdning fyri Føroyar.
Sambært løgtingsmanninum er tað týdningarmikið, at bæði landsstýrið og Løgtingið verða kunnað og tikin við upp á ráð í trygdarpolitiskum málum, ið viðvíkja Føroyum. Hann minnir eisini á, at nýtslan av Merkinum er lógskipað við flagglógini frá 1959.
– At danska verjan nýtir Merkið til at prýða sínar hernaðarbúnar, er ein grundleggjandi spurningur, sum ikki hevur verið viðgjørdur í politisku skipanini, skrivar Bjarni Kárason Petersen.
Fyrispurningurin er dagfestur 24. september og settur eftir grein 52a í tingskipanini.
