Íslendski Reyði Krossur hevur stovnað eina bráðfeingis innsavning til tess at hjálpa teimum, sum eru ávirkað av eldgosinum í Grindavík, og nú hava føroyingar - bæði einstaklingar og fyritøkur - eisini høvi at veita grannunum í Íslandi stuðul.

Síðan íbúgvar í Grindavík vórðu fluttir úr býnum, hevur Íslendski Reyði Krossur hjálpt eitt nú við bráðfeingisskjóli, fyribils leigubústaði, sálarligum stuðli og peningaligum stuðli til tey, ið hava ilt við at gjalda eyka leiguna - ella ikki hava fingu klæðir, mat og annað neyðugt við sær, tá tey vórðu flutt úr Grindavík.

Hvussu kanst tú hjálpa? spyr Reyði Krossur í Føroyum, sum nú vil, at føroyingar taka eina hond í við grannum okkara fyri vestan.

- Vilt tú at stuðla humanitera arbeiðinum hjá Íslendska Reyða Krossi, ert tú vælkomin at flyta okkum eina upphædd á konto hjá Reyða Krossi og viðmerkja “Ísland”.

Reyði Krossur í Føroyum leggur dent á, at bæði fólk og fyritøkur í Føroyum eru hjartaliga vælkomin at lata stuðul. Sí bankaupplýsingar her: https://redcross.fo/studla/ 

- Fólk kunnu eisini skipa fyri síni egnu innsavning. Á heimasíðu okkara ber til at lesa um góð ráð og hugskot, um tú vilt seta tína egnu innsavning í gongd, sí her: https://redcross.fo/egin-innsavning/

Hetta sigur Reyði Krossur í Føroyum í eini áheitan til Føroya fólk í dag.