Í nátt verður ein tann størsta hendingin í føroyskum ítróttarlívi nakrantíð, tá ið miðvingurin, Sverri Sandberg Nielsen fer at rógva finalu á olympisku leikunum í Tokyo. Øll tjóðin fylgir við og í heimbygd hansara, Miðvági, verður finalan víst á stórskíggja á veggin á skúlanum oman ímóti fótbóltsvøllinum.

Men øll tey, sum eru á ólavsøku verða heldur ikki við sviðusoð, tí finalan verður eisini víst á stórskíggja, sum verður settur upp Kongabrúnni og har tað ber til hjá øllum áhugaðum at fara oman at fylgja við í hesi stórhending.

Eve Skeel Nolsøe, marknaðar og produktstjóri á Føroya Tele, sum er stuðul hjá Sverra Sandberg Nielsen, sigur at tey høvdu alla tíðina ætlað at víst finaluna á stórskíggja, men tey fingu at vita, at tað var ikki ráðiligt, sum koronastøðan er. Men hon sigur, at nú er støðan broytt og tey hava fingið at vita, at nú ber tað kortini til at vísa finaluna á stórskíggja - og nú eru tey so farin at rigga til niðiri á Kongabrúnni.  Tað er Føroya Tele, sum skipar fyri við vælvild frá kommununi.

Hetta verður ein ómetaliga spennandi róður, tí Sverri Sandberg Nielsen liggur sera væl fyri at fáa heiðursmerki, og møguleikin hjá honum er ikki versnaður, nú ein av harðastu kappingarneytum hansara, Oliver Zeidler úr Týsklandi, snávaði í semifinaluni so at hann ikki kláraði at rógva seg í finaluna.