Liðið hjá Leivi Mortensen og Tróndi Mikkelsen - og komandi liðið hjá Erlingi Erlandssyni - HF Karlskrona spældi seinnapartin dyst á heimavølli í bestu svensku hondbóltsdeildini.

Dysturin í Brinova Arena endaði við 35-37 tapi fyri Ystad, ið er næstfremst í deildini. Í steðginum var Karlskrona á odda 21-20.

Leivur skoraði fýra mál upp á fimm málroyndir. Tróndur skoraði tvey mál upp á tvær málroyndir, og hann legði upp til tvey mál.

HF Karlskrona hevur bert fingið eitt stig í teimum trimum seinastu dystunum, og teir fimtaftast í deildini við sjey stigum. Tó eru bert trý stig upp til gylta áttanda plássið, ið gevur atgongd til ovara endaspælið aftaná lokið grundspæl. Har hevur liðið hjá Paula Jacobsen, IFK Skövde 10 stig.

Í morgin klokkan 15 hevur Skövde dyst á heimavølli móti Kristianstad, ið hevur kappast í innleiðandi bólkaspælinum í Champions League.