Tvey føroyingalið vóru í leiki í næstbestu donsku hondbóltsdeildini í dag, og í báðum førum gjørdist talan um sigrar.
Liðið hjá Silju G. Eystberg (myndin), Vár og Lív Zachariasen, Ajax vann í høllini í Bavnehøj stórsigur 33-22 á GOG. Í steðginum var støðan 16-12 til Ajax.
Silja skoraði átta mál, og var saman við Natascha Wollesen toppskjútti hjá heimaliðnum. Lív skoraði tvey mál og Vár skoraði eitt mál.
Ajax er nú fremst í deildini við 16 stigum. Roskilde og AGF hava 14 stig hvør. GOG er nummar fýra við 10 stigum.
Liðið hjá Rannvá Olsen, Ejstrup/Hærvejen hevur eisini 10 stig, men málmunurin sendir tær niður á sjeynda plássið.
Í dag vann Ejstrup/Hærvejen á heimavølli á einum øðrum liði, ið eisini hevur 10 stig, nevnliga SIK Viborg. Dysturin í Ejstrupholm høllini endaði við 27-25 sigri til Ejstrup/Hærvejen, ið var á odda 16-13 í steðginum.
Rannvá skoraði trý mál fyri heimaliðið.
