Yvir seks milliónir amerikanarar kunnu missa rættin til almennan matstuðul, verður eitt nýtt uppskot frá Trump-stjórnini sett í verk.

Tað skrivar tíðindastovan Reuters sambært Ritzau.

Uppskotið kemur frá amerikanska landbúnaðarmálaráðnum, USDA, og kann raka umleið 6,3 milliónir fólk.

Í USA kunnu borgarar við lágari inntøku fáa mánaðarligan stuðul til mat gjøgnum skipanina SNAP.

Í dag fáa nógvar familjur, sum fáa almannahjálp, sjálvvirkandi rætt til matstuðulin. Henda atgongdin skal sambært uppskotinum takast av.

Tað merkir, at familjurnar framyvir skulu lúka inntøkutreytirnar í sjálvari SNAP-skipanini fyri at fáa stuðul til mat.

Sambært egnu greiningini hjá ráðnum, sum er løgd við uppskotinum, kunnu nærum 18 prosent av teimum, sum fáa stuðul úr skipanini, missa veitingina. Tað svarar til umleið 6,3 milliónir fólk, skrivar Reuters.

Hetta kemur afturat skerjingunum, sum Donald Trump, forseti, framdi í juli 2025. Sambært Reuters hava tær longu havt við sær, at fleiri enn 5,5 milliónir amerikanarar hava mist rættin til matstuðul.

Amerikanska landbúnaðarmálaráðið hevur lagt fram uppskotið um at herða treytirnar fyri matstuðli. Brooke Rollins er landbúnaðarmálaráðfrú í USA. Savnsmynd.
Mynd: Kaylee Greenlee/Reuters