Filmsleikstjórin Gudmund Helmsdal og filmsframleiðarin Jón Hammer arbeiða í løtuni við ræðustuttfilminum Kallað, sum skal brúkast til at fáa fígging til ein føroyskan ræðufilm í spælifilmslongd.
Ætlanin er at gera ein film á altjóða støði, har føroyska náttúran og føroyskar sagnir fáa ein týðandi leiklut.
Spælifilmurin verður mettur at kosta millum 14 og 15 milliónir krónur.
Tað greiða teir báðir frá í samrøðu við Kringvarp Føroya.
Børnini hvørva úr skúlabussinum
Í stuttfilminum Kallað hevur sjónleikarin Sofía Nolsøe høvuðsleiklutin sum ein kvinnuligur bussførari.
Hon koyrir ein skúlabuss gjøgnum føroyska hagan, tá bussurin steðgar. Hon fer út at leita eftir telefonsambandi, men tá hon kemur aftur, eru øll børnini horvin.
Hendingin verður byrjanin til eina óhugnaliga søgu, har føroyska náttúran ikki bara er bakgrund, men ein týðandi partur av frásøgnini.
Gudmund Helmsdal hevur skrivað handritið og leikstjórnar filmin, meðan Jón Hammer, stjóri í Outlier Projects, er framleiðari.
Jonas Wagner er klippari, og Ólavur Jákupsson skal arbeiða við ljóðmyndini.
Íblástur úr føroyskum sagnum
Hugskotið til filmin kom sambært Gudmundi Helmsdal undir einum gongutúri í Kaldbakshaganum.
Har hoyrdu tey eina hundafloytu aftur og aftur, uttan at finna út av, hvaðani ljóðið kom.
Hetta fekk hann at hugsa um, hvat hevði hent, um floytan ikki varð brúkt til hundar, men til at stýra øðrum skapningum.
Í søguni er ein bóndi, sum ræður yvir einum stórum haga og brúkar eina serliga beinfloytu til at stýra verum, sum liva har.
Filmurin fær íblástur úr føroyskum sagnum og søgum, men talan verður ikki um eina beinleiðis filmatisering av kendum huldufólkasøgum.
Føroyska náttúran skal skapa óhugnan
Ein týðandi partur av verkætlanini er at vísa, hvussu føroyska náttúran kann brúkast í ræðufilmum.
Mjørki, brøtt fjøll, grýtut lendi og oyðin øki kunnu skapa ein serligan óhugna, sum henda filmsgreinin kann gagnnýta.
Samstundis vilja Gudmund Helmsdal og Jón Hammer vísa, at føroysk filmsfólk hava førleikar at standa fyri størri filmsframleiðslum.
Seinastu árini hava fleiri útlendskar filmsframleiðslur brúkt Føroyar sum upptøkuland, men ofta hava føroysku filmsfólkini havt stuðlandi leiklutir.
Við hesi verkætlanini vilja teir hava føroysk filmsfólk í teimum leiðandi størvunum.
Stuttfilmurin skal út á altjóða filmsfestivalar
Stuttfilmurin Kallað er nú í klipping. Næsta stigið verður millum annað at gera ljóð og tónleik, sum hava serliga stóran týdning í ræðufilmum.
Ætlanin er síðani at senda filmin á altjóða filmsfestivalar, har hann skal skapa áhuga fyri tí størra spælifilminum.
Sambært Gudmundi Helmsdal hevur verkætlanin longu vakt áhuga á altjóða filmstiltøkum í Suðurkorea og Helsinki.
Handritið til spælifilmin er nærum liðugt, men enn vantar fíggingina.
Vónin er, at stuttfilmurin kann sannføra íleggjarar og framleiðarar um, at ein føroyskur ræðufilmur við føroyskum filmsfólkum kann røkka einum altjóða áskoðaraskara.