Alternative für Deutschland, AfD, gjørdist størsti flokkur á landspartavalinum í Mecklenburg-Vorpommern sunnudagin.

AfD fekk 38,2 prosent av atkvøðunum, meðan SPD fekk 35,5 prosent.

Serliga álvarsamt er úrslitið fyri CDU hjá týska samveldiskanslaranum Friedrich Merz. Flokkurin fekk bara 4,9 prosent av atkvøðunum og kom sostatt akkurát ikki upp um sperrumarkið, sum er fimm prosent.

Tað merkir, at CDU ikki fær umboð í landspartatinginum í Mecklenburg-Vorpommern. Hetta er fyrstu ferð, at CDU ikki megnar at koma upp um sperrumarkið á einum landspartavali í Týsklandi.

Á seinasta valinum í Mecklenburg-Vorpommern fekk CDU 13,3 prosent av atkvøðunum. Afturgongdin er sostatt 8,4 prosentstig.

Týska tíðindastovan dpa lýsir úrslitið sum eina marru hjá Friedrich Merz. Politiska framtíð hansara hevur verið nógv umrødd, eftir at undirtøkan er minkað munandi í veljarakanningum seinastu mánaðirnar.

Tá fyrstu valhøliskanningarnar komu sunnukvøldið, fór Merz á røðarapallin í høvuðsskrivstovuni hjá CDU í Berlin.

Hann kallaði úrslitið í Mecklenburg-Vorpommern eina »vanlukku« og lovaði nýggjar nýskipanir.

– Eg taki hesa ábyrgdina á meg, tí eg vil flyta land okkara fram á leið, segði Friedrich Merz sambært AFP.

AfD gjørdist størsti flokkur við 38,2 prosentum, meðan SPD gjørdist næststørstur við 35,5 prosentum.