Menningin av vitlíki krevur sera stórt varsemi. Tað segði Sam Altman, stjóri í OpenAI, við trygdarráð ST mikudagin sambært AFP.

– Vinnan má ikki góðtaka ov stóran tøkniligan váða, bara tí fyrimunirnir eru ov stórir og týdningarmiklir til at seta ferðina niður, segði hann.

Dario Amodei, stjóri í Anthropic, ávaraði eisini um avleiðingarnar, um tøknin ikki verður handfarin væl.

– Verður hon handfarin illa, haldi eg enntá, at vitlíki kann vera ein váði fyri mannaættina sum heild, segði hann.

Granskarin Yoshua Bengio, sum hevur verið við til at leggja grundarlag undir nútímans vitlíki, nevndi váðan bæði veruligan og nærverandi. Eingin einstakur limur í trygdarráðnum kann fáa tamarhald á honum einsamallur, segði hann sambært Reuters.

Altman helt fram, at týdningarmestu avgerðirnar um vitlíki ikki eiga at verða tiknar í tøknistovum í San Francisco einsamøllum. Tær eiga at verða formaðar gjøgnum fólkaræðisligar mannagongdir og av stjórnum, sum standa borgarunum til svars. Tað krevur altjóða samstarv, segði hann.

Danski uttanríkisráðharrin, Lars Løkke Rasmussen, sum var við á fundinum, tók eisini undir við tørvinum á altjóða samstarvi. Hann vísti á, at spenningsøkið millum stóru møguleikarnar og váðarnar við vitlíki er ein av mest átrokandi avbjóðingunum í okkara tíð.

Dansk Industri vónar, at fundurin verður byrjanin til ítøkilig átøk. Stórveldini eiga í minsta lagi at viðurkenna, at tamarhald á teimum mest framkomnu AI-skipanunum er eitt felags trygdarmál – ikki bara ein kappdystur um at koma fyrst, sigur Andreas Holbak Espersen, ið hevur ábyrgd av AI-økinum í felagsskapinum.

Donald Trump, forseti í USA, tók eina aðra støðu í røðu síni á aðalfundi ST týsdagin. Hann avvísti royndir at gera eina altjóða skipan til at stýra vitlíki. USA fer at fremja tøknina heldur enn at halda henni aftur, segði hann. Hvíta húsið hevur almannakunngjørt útsagnirnar úr røðuni.

Ritzau/AFP/Reuters