Ukrainski forsetin, Volodymyr Zelenskyj, hevur í kvøld hildið røðu á ST-aðalfundi.

Her segði hann eitt nú, at 248.000 russisk herfólk antin eru dripin ella hava fingið álvarsligar løstir í krígnum í Ukraina higartil í ár.

- Tað er ørskapur, legði hann aftrat.

Forsetin segði, at Ukraina hevur video-prógv í hvørjum einstøkum føri.

- Russiski forsetin, Vladimir Putin, er einasti heimsleiðari, sum ynskir kríggið í Ukraina.

Volodymyr Zelenskyj segði, at kríggið sum heild hevur gjørt heimin til eitt ótryggari stað, og kríggið hevur økt um stríðsstøðið í restini av heiminum, legði hann aftrat.

Hann segði, at Ukraina hugsar um kríggj hvørja løtu, men hetta er ikki sjálvboðið, sum hann tók til. Russland hóttir tilverugrundarlagið hjá Ukraina.

- Vit velja at liva!

Volodymyr Zelenskyj vísti á, at Vladimir Putin aftur og aftur hevur lovað skjóta framgongd í krígnum - og so legði forsetin aftrat:

- Men, hetta fer at miseydnast honum - eisini hesaferð, segði ukrainski forsetin millum annað á ST-aðalfundi í kvøld.