Í dag hevur aftur verið leitað eftir teimum trimum saknaðu, sum fóru út at fiska við einum leigaðum frítíðarbáti í Noregi seinasta fríggjamorgun.
Tá báturin ikki var komin aftur, tá kvøldið kom, og tey sambært avtaluni skuldu verið komin til lands aftur, varð leiting sett í verk eftir kekkisku ferðafólkunum.
Seint fríggjakvøldið varð báturin funnin holvdur, og ein av teimum ferðandi varð funnin sjólátin. Eingin av hinum trimum er komin afturíaftur.
Norska løgreglan sigur, at leitingin í dag tíverri var úrslitaleys, og framvegis eru tey trý ferðafólkini, sum løgreglan roknar við eru sjólátin, saknað.
- Vit steðga nú leitingini fyri dagin. Avgjørt verður í morgin, um nýggj leiting verður sett í verk, sigur norska løgreglan.
Norska løgreglan hevur upplýst, at bátsvanlukkan eftir øllum at døma hendi út fyri lítlu oynna, Grip, sum liggur millum Averøy og Smøla.
Tey fýra, sum leigaðu frítíðarbátin til fisking seinasta fríggjadag, vóru partur av einum ferðalag úr Kekkia, sum taldi átta.
Lesið eisini: Krav skal verða um ferðaleiðara
