Tað gjørdist talan um tveir sigrar og eitt tap hjá føroyingaliðunum í bestu donsku hondbóltsdeildini hjá kvinnum í kvøld.

Liðið hjá Mariu P. Nólsoy tapti á heimavølli tepurt 29-31 fyri toppliðnum, Odense. Í steðginum var støðan javnleikur 16-16.

Maria skoraði seks mál upp á sjey málroyndir, og hon legði upp til trý mál. Maria vann eisini liðnum eitt brotskast, og hon var sambært hagtølunum mest effektivi leikarin hjá Keypmannahavn.

Keypmannahavn er nummar fimm í deildini við 12 stigum.

Liðið hjá Maritu Mortensen, Nykøbing-Falster vann á útivølli í Nørresundby stórsigur 29-18 á EH Aalborg. Í steðginum var Nykøbing-Falster á odda 15-8.

Marita skoraði tvey mál upp á fimm málroyndir.

Nykøbing-Falster er nummar trý í deildini við 15 stigum.

Liðið hjá Janu Mittún (myndin), Viborg vann á útivølli í Ølstykke greiðan 34-25 sigur á HØJ. Viborg gjørdi arbeiðið mest sum liðugt í fyrra hálvleiki. Í steðginum var støðan 21-9 til Viborg.

Jana skoraði tvey mál upp á tvær málroyndir, og hon legði upp til trý mál.

Viborg er nummar seks í deildini við 11 stigum.