Liðið hjá landsliðsliðskiparanum, Pernille Brandenborg heldur fast í oddasessinum í bestu rumensku hondbóltsdeildini.
Fyrr í dag vann CSM Bukarest á heimavølli stórsigur 38-26 (19-14) á Corona Brasov.
Pernille er mest í verjustøðu í dystum hjá CSM Bukarest. Í dag var hon noterað fyri eitt mál.
CSM Bukarest er fremst í deildini við 17 stigum fyri níggju dystir. Tær eru eitt stig frammanfyri Gloria Bistrita, ið tó hevur leikt ein dyst færri.
Komandi sunnudag klokkan 15 hevur CSM Bukarest dyst á heimavølli í innleiðandi bólki A í Champions League. Tá kemur franska liðið, Brest Bretagne á vitjan.
CSM Bukarest hevur nógv at hevna. Liðið hjá Pernille tapti farna leygardag á útivølli 25-40 fyri Brest Bretagne.
