Kjarnorkuverkið Zaporizjzja í Ukraina hevur mist sína eksternu streymveiting og noyðist tískil at brúka neyðstreym fyri at køla niður reaktorarnar á verkinum.
Tað upplýsir altjóða kjarnorkustovnurin IAEA sambært Reuters.
Starvsfólkini á verkinum siga sambært IAEA, at nóg mikið er av brenni til at dríva neyðaggregatini í tvær vikur.
Kjarnorkuverkið Zaporizjzja er við sínum seks reaktorum størsta kjarnorkuverk í Evropa.
Russland tók eftirlitið við ukrainska verkinum stutt eftir innrásina í februar í 2022 og hevur havt ræðið á verkinum síðan.
