Framyvir verða elbilar, sum verða framleiddir í Kina, tollaðir upp í 45,3 prosent, tá teir verða innfluttir til lond innan ES.
Hetta samtykti ES-nevndin í dag, skrivar Reuters.
ES hevur longu tíggju prosent toll á kinesiskum elbilum.
Eftir eina kanning av kinesiskum ríkisstuðli gjørdu ES-londini fyrr í oktober av, at upp til 35,3 prosent eyka í tolli skuldi leggjast á elbilar frá kinesiskum verksmiðjum.
Tað er henda hækking, sum nú formliga er samtykt, sigur eitt høgt embætisfólk í ES við Reuters.
Nýggju tollsatsirnir koma í gildi í morgin.
Eykatollurin er ymiskur frá bilmerki til bilmerki. Tesla, sum verður rakt av minstu hækkingini, verður rakt við einum tolli uppá 7,8 prosent afturat, meðan kinesiska bilmerkið SAIC verður rakt við einum tolli uppá 35,3 prosent afturat.
Broytingarnar eru fyri at tryggja fair play hjá evropeiskum bilframleiðarum.
Í vár gjørdi ES-nevndin kanningina av ríkisstuðlinum til kinesiskar bilframleiðarar. Niðurstøðan í kanningini var, at Kina gav órímiligan ríkisstuðul til sínar egnu bilframleiðarar.
Sambært ES-nevndini skapti Kina harvið eina skeikling av marknaðinum í ES. Fyri at verja evropeisku bilframleiðararnar ætlaði ES-nevndin tí at seta eyka toll á kinesiskar elbilar.
Tað sama hava USA og Kanada gjørt fyrr. Í báðum londum er 100 prosent avgjald lagt á kinesiskar elbilar.
Týskland er millum fleiri ES-lond, sum hava kravt eitt alternativ til hækkaða tollin á kinesiskt framleiddum elbilum.
Landið er størsti búskapur í ES og størsti bilframleiðari.
Týski kanslarin, Olaf Scholz, hevur áður sagt, at hansara stjórn óttast fyri, at hækkaði evropeiski tollurin á kinesiskar elbilar verður svaraður aftur við hækkaðum kinesiskum tolli á týskar bilar.
Sambært Dansk Industri (DI) nýtast donskum brúkarum ikki at óttast generelt hækkandi prísir á elbilamarknaðinum orsakað av nýggju tollinum.
Tað sigur Thomas Møller Sørensen, deildarstjóri í DI Bilbranchen, í skrivligari viðmerking til Ritzau.
- Evropeiski marknaðurin er so avgerandi fyri kinesisku bilframleiðararnar, at vit vænta, at teir antin rinda tollin burturúr egnum vinningi ella alternativt leggja framleiðsluna uttan fyri Kina.
- Kappingin á marknaðinum fyri elbilar er so hørð, at príshækkingar fyri nógv bilmerki í roynd og veru fara at hava við sær, at teir eru úti av marknaðinum, sigur hann.
Sambært Reuters metir ES-nevndin, at kinesiskir elbilaframleiðarar standa fyri átta prosentum av elbilamarknaðinum í ES. Í 2019 stóðu kinesiskt framleiddir elbilar minni enn einum prosenti av elbilunum, sum vórðu seldir í ES.
Sambært kommissiónini eru prísirnir á elbilum frá verksmiðjum í Kina vanliga 20 prosent lægri enn prísurin á elbilum, sum verða framleiddir innan ES.
ES-nevndin hevur havt fleiri tekniskar samráðingar við Kina í eini roynd at finna eitt alternativ til hækkaðan toll. Men higartil hevur tað ikki eydnast.
Sambært kommissiónini halda samráðingarnar fram, eftir at nýggi tollurin er komin í gildi, skrivar Reuters.
/Ritzau/