Fríggjadagin var tónlistaskúlin í Eysturkommunu á konsertferð í Leirvík. Talan var um 13 útvaldar næmingar í 4., 5. og 6. flokki, sum framførdu á klaver, gittara, floytu og violin.
- Dagurin byrjaði við at leggja leiðina til Leirvíkar at framføra fyri næmingum og lærarum í Leirvíkar skúla. Eftir hetta gekk leiðin niðan í dagstovnin Brúsa, har framført varð fyri børnum og starvsfólkum á stovninum.
Á heimasíðuni hjá Eysturkommunu, sum Leirvík eisini er partur av, verður sagt, at næmningarnir at enda henda dagin fingu ein góðan bita í Bovling í Leirvík saman við undirvísarunum.
Sagt verður, at næmingarnir vav og á vitja skúlar og dagstovnar í kommununi og framføra fyri teimum.
- Hetta var fyrstu ferð, at tónlistaskúlin fór á eina konsertferð, og tað ætla tey heilt sikkurt at gera meira av.
Jón Eliassen, leiðari á tónlistaskúlanum, sigur við heimasíðuna hjá Eysturkommunu, at ein slík konsertferð bæði er gevandi og mennandi musikalskt og sosialt.
- Nógvir næmingar ganga til soloundirvísing. Tí hevur tað týdning, at tey hitta hvønn annan og spæla tónleik saman. Hetta styrkir ikki bara teirra musikalsku førleikar, men eisini felagsskapin og samanhaldið í tónlistaskúlanum.
Lagt verður aftrat, at árliga næmingakonsertin hjá tónlistaskúlanum í Eysturkommunu verður í miðhøllini í Leirvíkar skúla tann 8. desember 2026.
Á heimasíðuni - www.eysturkommuna.fo - síggjast fleiri myndir frá konsertferðini.
