Tað endaði 1-1, tá ið Føroyar settu hol á nýggju Nations League kappingini. Føroyskur málskjútti var Áki D. Samuelsen, sum var á landsliðnum fyri triðju ferð, og sum fyri fyrstu ferð var við í týdningarmiklum dysti.

Hetta var tá ið eitt lítið korter var farið, og tað var eftir, at stinni miðverjin Andrias Edmundsson var heilt frammi í vinstru og legði flatt innfyri, og smekkaði Áki D. Samuelsen bóltin upp í nettakið.

-Eg eri sjálvandi ógvuliga fegin um málið, og talan var um sera gott uppspæl, men eg eri harmur um, at tað ikki eydnaðist okkum at vinna, tí eg haldi, at vit høvdu møguleikar til tað, sigur Áki D. Samuelsen í samrøðu við Kringvarp Føroya.

Adrian Justinussen avloysti í 65. minutti Petur Knudsen sum fremsti maður. Dygst frammanundan hevði Géza Dávid Turi eftir gott álop og innlegg úr vinstru frá Hanusi Sørensen kiksað úr góðari støðu, og so var tað møguleikin hjá Adriani Justinussen.

Bólturin varð lagdur fram í brotsteigin eitt sindur í høgru til Adrian, sum royndi seg við skoti. Hann smekkaði til, men málverjin stórbjargaði, og so kunnu Adrian og øll í føroysku leguni iðra seg um, at Adrian ikki legði bóltin upp á tvørs, har Hanus Sørensen var púra leysur.

Yerlanov javnaði til 1-1 í 26. minutti. Kasakstan vann horna í høgru, og eftiransingarnar vóru ikki nóg neyvar, og so varð bólturin við høvdinum settur í málið.

 -Eg harmist úrslitið, tí kvaliteturin hjá okkum var betri, enn hann var hjá Kasakstan, og teir megnaðu ikki at vinna seg til nakran annan møguleika, og so haldi eg, at eg átti at vert betri, tá ið teir skoraðu, sigur Andrias Edmundsson, miðverjin sum legði upp til 1-0 málið, og sum sjálvur heldur, at hann átti at vart betri, tá ið Kasakstan javnaði.

Eyðun Klakstein landsliðsvenjari harmast um, at tað ikki eydnaðist at vinna fulla úrtøku:

-Javnleikur er kanska at liva við, men vit høvdu góðar málmøguleikar at skora fleiri enn eitt mál, og so eigur tað ikki at koma fyri, at vit fáa mál ímóti okkum við hornasparki, sigur Eyðun Klakstein landsliðsvenjari.

-Eg kann ikki fílast á tað, sum spælararnir løgdu fyri, men talan var um misjavnt avrik. Serliga í seinna hálvleiki vóru vit ikki so ofta í støðunum, sum kundu borið møguleikar í brotsteiginum við sær nú. Sjálvandi iðra vit okkum, men hugburðurin var góður, og í kvøld fara vit til Moldova, og týskvøldið fara vit at vera klárir í Moldova, sigur Eyðun Klakstein.