Hjalti Gunnarstein, fyrrverandi landsapotekari, er ákærdur fyri skjalafalsan og embætismisnýtslu. Ákæruvaldið krevur fongsulsrevsing, skrivar Kringvarp Føroya.

Ákærurnar snúgva seg í høvuðsheitum um, at hann skal hava sett navnið hjá einum pensjóneraðum lækna á reseptir og brúkt tær til at fáa heilivág frá Tjaldurs Apoteki í Havn. Læknin hevði sambært ákæruritinum ikki longur heimild at útskriva heilivág.

Ákæruvaldið hevur savnað átta ítøkilig dømi frá 12. januar 2023 til 14. mai 2025. Harumframt fevnir eitt ákærupunkt um í minsta lagi 20 føri frá apríl 2016 til juni 2021, tá hann skal hava brúkt somu mannagongd.

Ákærdur fyri at misnýta starvið

Sambært Kringvarpinum er talan millum annað um pínulinnandi heilivág, heilivág fyri høgt blóðtrýst og hjarta, antibiotika og salvu fyri húðsjúkur.

Umframt ákærurnar um skjalafalsan er Hjalti Gunnarstein ákærdur fyri embætismisnýtslu. Ákæruvaldið heldur, at hann sum ovasti leiðari fyri Apoteksverkið skal hava misnýtt starv sítt til órættiliga at fáa reseptheilivág útflýggjaðan.

Ógreitt um hann játtar seg sekan

Katrin Thorsvig Hansen, høvuðsákæri, upplýsir fyri Kringvarpinum, at ákæruvaldið krevur fongsulsrevsing. Hon vil ikki siga, hvussu drúgva revsing talan verður um.

Ákæruvaldið ætlar at føra málið sum eitt játtanarmál og væntar sostatt, at fyrrverandi landsapotekarin játtar seg sekan. Tað er tó ikki staðfest.

Jógvan Páll Lassen, verji hjá Hjalta Gunnarstein, sigur við Kringvarpið, at hann enn ikki kann upplýsa, um klientur hansara játtar seg sekan.

Hjalti Gunnarstein segði seg úr starvi sum landsapotekari 17. februar í ár. Sambært Kringvarpinum stóð hann tá til at verða burturvístur.