Lógarnevndin í grønlendska landstinginum, Inatsisartut, mælir nú til, at summartíð verður avtikin frá næsta ári. Samstundis mælir ein meiriluti í nevndini til, at vanliga tíðarøkið í Grønlandi verður flutt aftur frá UTC-2 til UTC-3 í 2028.
Verður uppskotið samtykt, merkir tað, at urini í Grønlandi ikki skulu setast ein tíma fram á vári 2027. Tá verður tíðarmunurin til Danmark og Vesturevropa fýra tímar um summarið, meðan hann verður tríggjar tímar um veturin.
Frá 2028 kann munurin gerast enn størri. Tá er ætlanin at flyta vanliga tíðarøkið aftur til UTC-3. Um Evropa framvegis hevur summartíð, verður Grønland tá fimm tímar aftanfyri Danmark og Vesturevropa um summarið og fýra tímar aftanfyri um veturin.
Broyttu klokkuna í 2023
Størsti parturin av Grønlandi fór í oktober 2023 úr UTC-3 í UTC-2. Ittoqqortoormiit fylgdi eftir í 2024. Broytingin hevur síðani verið nógv umrødd og hevur býtt bæði borgarar og vinnulív.
Millum atfinningarnar hevur verið, at sólin kemur seinni upp um morgunin, og at tað serliga kann merkjast hjá børnum og familjum í vetrarhálvuni. Hinvegin hava millum onnur Air Greenland og fólk innan vetrarítrótt víst á fyrimunir við longri ljósi seinnapartin og minni tíðarmuni til Danmark.
Grønland hevur tó ikki bara eitt tíðarøki. Størsti parturin av landinum er í UTC-2, Pituffik Space Base er í UTC-4, og veðurstøðin í Danmarkshavn er í UTC+0.
Endalig avgerð ikki tikin
Málið skal til aðru viðgerð í Inatsisartut 13. oktober og eftir ætlan til triðju og endaligu viðgerð 21. oktober. Tað er tí enn ikki endaliga avgjørt, at summartíðin verður avtikin ella at tíðarøkið verður flutt aftur.
Broytingin kann eisini fáa praktiskan týdning fyri føroyingar, sum arbeiða, ferðast ella hava vinnuligt samband við Grønland. Størri og skiftandi tíðarmunur kann ávirka flogferðslu, fundartíðir og dagligt samstarv millum londini í Útnorðri.
Kelda: Sermitsiaq
