Hægstirættur í USA hevur víst aftur einari umbøn um at lata amerikanska postverkið seta strangari reglur fyri brævatkvøður í verk.

Tað skriva tíðindastovurnar AP og Reuters.

Donald Trump forseti, sum leingi hevur verið ímóti brævatkvøðum, skrivaði síðst í mars undir eini boð, sum ásettu fleiri nýggj og strangari krøv til brævatkvøður.

Mótstøðufólk hava síðan roynt at forða stjórnini hjá Trump í at seta reglurnar í verk. Reglurnar kunnu fáa stóran týdning fyri amerikanska miðvalið fyrst í november.

Á miðvalinum stríðast Donald Trump og Republikanski flokkurin fyri at varðveita meirilutan í Kongressini.

Føderalur dómari steðgaði reglunum

Mánadagin vísti Hægstirættur aftur einari umbøn frá amerikanska løgmálaráðnum um at ógilda ein eldri úrskurð frá einum føderalum dómara.

Dómarin hevði forðað postverkinum í at seta tær nýggju reglurnar í verk.

Tveir av teimum níggju hægstarættardómarunum vóru ósamdir í avgerðini, skrivar Reuters.

Avgerðin merkir sambært AP, at statirnir framhaldandi kunnu senda atkvøðuseðlar við postinum eftir somu mannagongdum, sum teir hava nýtt í áravís.

Ein triðingur atkvøður við brævi

Málið hevur stóran týdning fyri miðvalið 3. november, tí næstan ein triðingur av amerikonsku veljarunum atkvøður við brævi, skrivar AP.

Fleiri statir fóru longu í síðstu viku undir at senda teir fyrstu atkvøðuseðlarnar til amerikanskar veljarar.

Trump hevur leingi funnist at skipanini við brævatkvøðum. Uttan prógv hevur hann givið brævatkvøðunum skyldina fyri, at hann tapti forsetavalið fyri demokraturin Joe Biden í 2020.

Í boðunum frá mars kravdi Trump millum annað, at hvør statur skuldi gera listar yvir amerikanskar ríkisborgarar við valrætti.

Sambært boðunum skuldu atkvøðuseðlar bert sendast til veljarar, sum vóru á góðkendum listum yvir brævatkvøðuveljarar hjá statunum. Brævbjálvarnir skuldu eisini hava eitt serstakt strikumerki, so til bar at spora teir.

/Ritzau