Eitt nýtt navn er í føroyska landsliðshópinum, sum komandi vikuna skal spæla móti Ísrael, Danmark og Moldova. Talan er um 25 ára gamla áleyparan John Frederiksen. Hann hevur leingi havt eitt mál, um at koma á landsliðið og mánadagin í farnu viku komu so boðini, ið hann heuvr bíðað so leingi eftir.

- Tað var ein stórur lætti fyri meg, sum havi havt hetta sum eitt mál leingi. Tað er eisini eitt sindur undarligt, tí tað er fyrst nú at tað gongur upp fyri mær, tá eg kom í klæðini og inn á Tórsvøll, sigur John Frederiksen.

Hann fortelur eisini um sína yrkisleið í Finnlandi og Eysturríki, og hvussu tað er komið í lag. Hann vísur, at tað ræður um at byggja uppá. Tí var skiftið til Eystrríki eitt stig á leiðini. Hann spælir í næstbestu deildini, men kemur hann upp í bestu deildini, so spælir hann í 9. bestu deildini í Evropa.

- Hetta flytingarvindeygað eru 18 spælarar farnir úr næstbestu deildini upp í bestu deildina og spæla fast. Mennist tú í næstbestu deildini og kemur longur upp, so ert tú í 9. bestu deildini í Evropa, vísur áleyparin á.

Hann er heldur ikki bangin fyri at droyma stórt fyri landsliðið.

- Hetta er spennandi. Tá eg hoyri Ísrael, so skulu vit vinna. Eg eri ikki bangin fyri at siga, at vit skulu vinna. Liðið hevur gjørt tað væl í seinastuni og skulu vit byggja upp á, so skulu vit tora at fara á vøllin móti Ísrael og vísa at vit vilja vinna. Eg fari at geva alt, sum eg eigi og so fáa vit at síggja um Håkan Ericson vil brúka meg, sigur John Frederiksen at enda.

Føroyar spæla í kvøld klokkan 19.45 móti Ísrael á Tórsvølli. FM1 hevur beinleiðis frásøgn frá dystinum. FM1 byrjar við upptakt longu klokkan 15.

##ms##