Drúgva viðgerðartíðin í málinum móti Bakkafrosti fær nú løgmann at venda sær til danska løgmálaráðharran.

Løgmansskrivstovan boðar frá, at Beinir Johannesen, løgmaður, sum eisini umsitur lógarmál, hevur biðið Nicolai Wammen um eina frágreiðing um viðgerðartíðina í málinum.

– Tað er av stórum týdningi, at mál, sum verða meldað til løgregluna, verða avgreidd í rímiligari tíð, og neyðugu stigini verða tikin, áðrenn mál fyrnast, sigur Beinir Johannesen.

Hann leggur dent á, at tað hevur týdning fyri rættartrygdina í samfelagnum, at mál verða avgreidd rættstundis í rættarskipanini.

Meira enn fýra ár til ákæru

Áheitanin kemur, eftir at Føroya rættur týsdagin 3. november staðfesti, at málini móti Bakkafrosti eru fyrnd.

Heilsufrøðiliga starvsstovan meldaði Bakkafrost í desember 2021, men ákæra varð ikki reist fyrr enn í apríl í ár.

Katrin Thorsvig Hansen, høvuðsákæri, hevur við Kringvarpið greitt frá, at starvsfólkatrot er ein av orsøkunum til drúgvu viðgerðartíðina.

Skuldarspurningurin ikki viðgjørdur

Ákærurnar snúðu seg um seks møgulig brot á flutningskunngerðina í 2020. Sambært ákæruvaldinum vóru flutningar í Suðuroynni framdir uttan loyvi frá Heilsufrøðiligu starvsstovuni. Harumframt var ákært fyri vantandi skráseting av einum flutningi úr Froðba til Porkeris.

Rætturin hevur ikki tikið støðu til, um Bakkafrost framdi lógarbrotini. Fyrst varð viðgjørt, um málini vóru fyrnd, soleiðis sum verjin hjá felagnum gjørdi galdandi.

Upprunaliga fráboðanin fevndi um bæði flutningskunngerðina og lúsakunngerðina. Tá metti Heilsufrøðiliga starvsstovan, at grundarlag var fyri einari sekt á 67 milliónir krónur. Tað var sostatt ein meting hjá starvsstovuni og ikki ein sekt, sum rætturin hevði álagt felagnum.

Sambært Kringvarpinum fekk ákæruvaldið 14 dagar at taka støðu til, um úrskurðurin skal kærast til Landsrættin.