Beinir Johannesen, løgmaður, fór ikki til Keypmannahavnar at hitta ukrainska forsetan, Volodymyr Zelenskyj, sum vitjar í Danmark í gjár og í dag. Løgmaður sigur við in.fo, at hann varð verandi í Føroyum, tí hann skuldi á tingfund í dag.
Lesið eisini: Løgmaður takkað nei til at hitta Zelenskyj
Tingfundurin byrjar klokkan 11. Munnligu fyrispurningarnir til løgmann og landsstýrisfólk eru annað mál á skránni. Framløga er síðsta mál.
Spyr, hvør sleppur inn á Rásina
Fyrst skal Løgtingið atkvøða um, hvørt ein skrivligur fyrispurningur frá Sámali Peturi í Grund skal setast Bárði á Lakjuni, landsstýrismanni í mentamálum.
Rásin er sambært reglugerðini frá 2016 eitt heildartilboð við bústaði, arbeiði og fakligari menning fyri ung við menningartarni, sum eru liðug við fólkaskúlan.
Sámal Petur í Grund vil hava at vita, um reglugerðin framvegis er galdandi, hvør málbólkurin er í dag, og hvørji krøv verða sett teimum, sum søkja. Hann spyr serliga, um umsøkjarar skulu vera sjálvbjargnir fyri at sleppa inn, og hvønn týdning tørvurin á stuðli ella hjálp hevur fyri avgerðina.
Í viðmerkingunum vísir hann á, at Rásin lýsir sjálvbjargni sum eitt mál við skúlagongdini. Hann vil tí hava greiðu á, um ung við størri menningartarni og størri stuðulstørvi hava sama møguleika at sleppa inn sum onnur í málbólkinum.
Hann spyr eisini, hvussu nógv søktu til skúlaárið 2026/2027, hvussu nógv fingu noktandi svar og hví. Harumframt vil hann hava at vita, hvør situr í bólkinum, sum tekur avgerð um upptøkuna, og um landsstýrismaðurin heldur, at upptøkan í dag samsvarar við málbólkin í reglugerðini.
