Ein samveldisdómari í USA hevur sýtt bretska miðlahúsinum BBC at fáa málið, sum Donald Trump hevur reist móti tí, víst burtur. Tað skrivar Ritzau.

Málið snýr seg um eina dokumentarsending, har BBC klipti tveir partar av einari røðu hjá Trump saman. Røðan varð hildin undan álopinum á Kongressina 6. januar 2021. Klippingin fekk tað at síggja út, sum um Trump beinleiðis heitti á sínar stuðlar um at leypa á kongressbygningin.

BBC hevur biðið um umbering fyri klippingina og vísir aftur, at talan var um ærumeiðing. Avgerðin hjá dómaranum snýr seg um, at málið kann viðgerast víðari. Enn er eingin dómur fallin um endurgjaldskravið.