Flávio Bolsonaro, sum sunnudagin tapti forsetavalið í Brasil, er sambært ónevndum keldum farin úr landinum.

Tað skriva bæði CNN Brasil og Reuters. Upplýsingarnar eru enn ikki alment váttaðar.

Keldur siga týsdagin við miðlarnar, at Bolsonaro er umborð á einum flogfari á veg til USA.

Tíðindini koma, eftir at fleiri miðlar hava skrivað, at passið hjá honum skal vera ógildað.

Segði seg ikki ætla at flýggja

Mánadagin segði Bolsonaro í einum sjónbandi á Instagram, at samveldisløgreglan hevði biðið hann lata passið inn. Sambært AFP segði hann eisini, at ein dómstólur hevði noktað honum at fara úr Brasil.

Bolsonaro, sum hevur noktað at viðurkenna valtapið, legði tá dent á, at hann ikki ætlaði sær at flýggja úr landinum.

Hvørki amerikanska sendistovan í Brasil ella advokatarnir hjá Bolsonaro høvdu svarað fyrispurninginum frá Reuters um málið.

Beiggin býr í USA

Yngri beiggi hansara, Eduardo Bolsonaro, býr eisini í USA. Undan valinum segði hann, at eitt valtap átti at fingið Flávio at farið úr Brasil.

– Um beiggi mín ikki vinnur, taki eg undir við, at hann fer úr landinum, segði Eduardo Bolsonaro í einari samrøðu við poddvarpsvertin Steven Crowder fyrr í hesum mánaðinum.

45 ára gamli høgravendi senatorurin Flávio Bolsonaro er sonur fyrrverandi forsetan Jair Bolsonaro. Pápin situr í fongsli fyri eina roynd at fremja kvett móti Luiz Inácio Lula da Silva, sum nú er afturvaldur til forseta.

Flávio Bolsonaro verður sjálvur kannaður fyri illgruna um korrupsjón og hvítvasking í sambandi við fíggingina av einum ævisøguligum filmi um pápan. Hann noktar at hava gjørt nakað ólógligt.

Ritzau