- Í løtuni er ísfiskalínuskipið norðanfyri, har teir fáa mest av hýsu og so nakað av toski. Væntandi kemur ísfiskalínuskipið inn at landa síðst í næstu viku.

Soleiðis siga tey á Fiskamarknaði Føroya í dag.

- Seks frystilínuskip fiska í føroyskum sjógvi. Skipini fáa eina blanding av hýsu, toski og so nakað av longu og brosmu.

Lagt verður aftrat, at eitt frystilínuskip fiskar svartkalva í Eysturgrønlandi.

Um útlitini til útróður verður sagt, at streymurin verður góður fyrst í vikuni sum kemur, men harðnar, sum vikan gongur.

- Veðrið verður umskiftandi, men vit vænta, at nakað verður av útróðri.

Á Fiskamarknaði Føroya siga tey, at útróðrarbátarnir fáa mest av hýsu og so nakað av toski.