Tey, sum hava koyrt framvið Kommunalu Brennistøðini, hava kanska lagt merki til nakrar stórar, hvítar ruskbilar, sum standa uttan fyri hjá Gervi hinumegin vegin.

Á bilunum stendur bæði »ELECTRIC« og »100% EL«, og teir eru merktir við búmerkinum hjá Kommunalu Brennistøðini.

Bilarnir eru partur av nýggja sáttmálanum um ruskinnsavning í Tórshavnar kommunu, sum kemur í gildi 1. oktober.

Tórshavnar kommuna skrivaði í september í fjør undir 12 ára sáttmála við Landleiðina um ruskinnsavningina. Í sambandi við nýggja sáttmálan skuldi Landleiðin keypa sjey nýggjar ruskbilar, og allir eru elriknir.Kommunan legði í útboðnum stóran dent á, at ruskinnsavningin skuldi gerast grønari. Við elbilunum verður minni óljóð og eingin beinleiðis útlátsdálking frá motorunum, tá bilarnir koyra millum húsini.

Tá sáttmálin varð undirskrivaður, segði Elsa Berg, borgarstjóri, at hetta var eitt av fyrstu stigunum hjá kommununi at flyta tungu ferðsluna yvir á varandi orku.

Nýggi sáttmálin kostar 13.598.124 krónur um árið uttan meirvirðisgjald. Tað er umleið 1,75 milliónir krónur meira um árið enn verandi ruskinnsavning.

Nú eru í øllum førum nakrir av nýggju bilunum komnir til Havnar og standa klárir. Á myndunum síggjast tveir nýggir Iveco-ruskbilar við føroysku nummarspjøldrunum NA 023 og AR 813.

Frá hósdegnum 1. oktober fara teir eftir ætlan út á vegirnar at savna ruskið hjá havnarborgarum.