Tað er sera gott lag á Bill Jaobsen og hansara monnum í FC Hoyvík. Í kvøld áttu teir heimavøll ímóti grannunum í HB, og teir næstbestu hjá skjótt 120 ára gamla HB fóru omanaftur í Gundadal við 2-1 tapi.
Úrslitið ber við sær, at HB er aftast við 9 stigum, at FC Hoyvík er næstaftast við 12 stigum, og at tað eru trý stig fram til KÍ, sum á áttanda plássi hevur 15 stig.
Sunnudagin um eina viku fær FC Hoyvík vitjan av B71, og um tað tá eydnast at vinna fulla úrtøku og eisini leygardagin 17. august, tá ið FC Hoyvík verður gestur hjá HB, so fer tað at síggja væl bjartari út hjá FC Hoyvík, enn tað hevur gjørt higartil í ár.
2-1 sigursmálið hjá FC Hoyvík í dag skoraði nýggi álopsspælarin Simon Jørgensen. Hann hevur inntil nýliga verið akademispælari hjá OB í Odense, sum sigst eiga eitt tað besta akademiið í Danmark. Tað var tveir minuttir undan leikloki, at Simon Jørgensen skoraði 2-1 sigursmálið. 18 ára gamli álopsspælarin var eisini við, tá ið FC Hoyvík 3. juli spældi málleysan javnleik í Klaksvík.
Heðin Olsen legði í sjeynda minutti FC Hoyvík á odda 1-0. Hetta var fjórða málið hjá 18 ára gamla Heðini Olsen í næstbestu deildini í ár.
Í 37. minutti javnaði Dávnjal Reginsson til 1-1. Hetta var triðja málið hjá Dánjali Reginsson á næstbesta HB liðnum í ár.
Í kvøld vóru Jákup L. Thomsen og Magnus Holm Jacobsen millum teir fyrstu ellivu hjá HB.
Næsti dystur hjá HB verður næsta leygardagi, tá ið HB fær vitjan av oddaliðnum FC Suðuroy.
