Nú seks umfør eru eftir at leika í bestu svensku fótbóltsdeildini hjá kvinnum, Damallsvenskan økjast sannlíkindini fyri, at liðið hjá Jóhonnu Fossdalsá Sørensen fer at vinna meistaraheitið.
BK Häcken er fremst í deildini við 55 stigum, fimm stig frammanfyri nummar tvey, Hammarby.
Leygardagin vann Häcken stórsigur 6-0 á IFK Norrköping í ítróttarparkini í Norrköping.
Tá Jóhanna kom á vøllin í 61. minutti var støðan 2-0. Bert tveir minuttir seinni legði Jóhanna upp til mál, tá ið Anna Anvegård økti til 3-0. Omewa Joy Ogochuckwu, Tabitha Michelle Tindel, Emma Alva Elisabeth Selerud og Stine Sandbech skoraðu hini málini. 4-0 málið var eitt sjálvmál.
Klokkan 12 spæla landsliðsliðskiparin, Ásla Johannesen og liðfelagarnir í Piteå dyst á útivølli móti Rosengård.
