Tíggju minuttir undan leikloki í dystinum ímóti Kasakstan, sum endaði 1-1, varð Mattias Hellisdal skiftur inn á føroyska liðið. Hann avloysti Géza Dávid Turi.
Júst henda skiftingin var serlig. Hetta var fyrsta ferðin yvirhøvur, at miðvallarin Mattias Hellisdal varð skiftur inn á føroyska landsliðið, og merkisvert var tað eisini, at Mattias Hellisdal er landsliðsspælari nummar 200 í altjóða skrásettum landsdysti, vísir yvirlitið á FaroeSoccer.
Føroyar spældu fyrsta altjóða skrásetta landsdystin 24. august í 1988, tá ið tað í vinadysti í Akranesi endaði við1-0 tapi ímóti Íslandi.
Nations League dysturin ímóti Kasakstan í kvøld var nummar 262 í røðini, og Mattias Hellisdal er landsliðsspælari nummar 200.
20 ára gamli Mattias Hellisdal er uppvaksin í B36. Í august í fjør flutti hann úr B36 og til Västerås SK í bestu svensku deildini, har hann hevur staðið seg so mikið væl, at hann er fastur maður á miðvøllinum, og í kvøld var hann fyri fyrstu ferð á føroyska A-landsliðnum – sum spælari nummar 200.
