Eitt russiskt dronuálop hevur rakt nærindis ukrainska býnum Jahodyn við markið til Pólland.

Ukrainski uttanríkisráðharrin, Andrij Sybiha, skrivar á X, at álopið vísir, at russiski kríggið nærkast ES og Nato.

– Barbariska álopið hjá Russlandi á ukrainsk-pólska markið í Jahodyn er ikki bara framhald av álopunum á markið hjá landi okkara. Hetta er yvirgangurin hjá Putin, sum bankar beinleiðis á dyrnar hjá ES og Nato, skrivar hann.

Dariusz Sienicki, talsmaður hjá pólsku marknavørðunum, sigur við Wirtualna Polska, at russiska dronuálopið rakti umleið 800 metrar frá pólska markinum, skrivar pólski miðilin TVP.

Marknaeftirlitið í Dorohusk varð stongt í nátt orsakað av álopinum, men er latið uppaftur. Eingin varð særdur pólsku megin markið.

Ukrainski uttanríkisráðharrin heitir á sameindu londini hjá Ukraina um at herða tiltøkini móti Russlandi munandi. Hann mælir millum annað til fullkomið handilsbann, innferðarbann og víðfevnd revsitiltøk móti russiska hernaðarliga ídnaðinum.

Álopið við pólska markið kemur samstundis sum Russland hevur framt fleiri álop aðrastaðni í Ukraina.

Leygardagin lótu minst níggju fólk lív í russiskum loftálopum, upplýstu ukrainskir myndugleikar sambært Reuters. Í Kramatorsk í eystara parti av Ukraina vórðu bilar hjá sivilfólki álopnir tríggjar ferðir innan 90 minuttir. Trý fólk doyðu og fýra vórðu særd.

Í nátt eru minst fimm fólk harumframt særd í russiskum álopum á Odesa, upplýsa ukrainskir myndugleikar.