Magnus Árason hjá Mors/Thy verður einasti føroyski leikarin í FINAL FOUR í donsku steypakappingini.

Dreymurin um FINAL FOUR brast hjá Teis Horn Rasmussen og hinum hjá TTH Holstebro í fjórðingsfinaluni í kvøld.

Í Gråkjær Arena í Holstebro tapti heimaliðið 29-33 fyri Fredericia. Í steðginum stóð væl til hjá Holstebro, ið var á odda 17-15. Men í seinna hálvleiki gekk illa í hond.

Teis var effektivur. Hann skoraði tvey mál upp á tvær málroyndir, og hann vann liðnum eitt brotskast.

Higartil hava Mors/Thy, Aalborg og Fredericia vunnið seg í FINAL FOUR. Fjórða liðið verður antin Skjern ella Bjerringbro/Silkeborg.

FINAL FOUR verður leikt í Boxen høllini í Herning, vikuskiftið 14. og 15. februar.