Crystal Palace kunngjørdi mánadagin, at 53 ára gamli Thomas Frank er nýggjur høvuðsvenjari hjá felagnum. Hann tekur við eftir Pierre Sage, sum varð koyrdur í síðstu viku eftir fimm mánaðir í starvinum.
Crystal Palace hevur sjey stig eftir tíggju dystir og liggur aftast í Premier League. Liðið hevur tapt fýra landskappingardystir á rað, seinast 1–3 á heimavølli móti Liverpool.
Steve Parish, nevndarformaður í Crystal Palace, vísir á, at Thomas Frank hevur víst, at hann dugir at byggja upp lið, sum vinna, og at menna spælarar. Hann væntar, at royndirnar hjá danska venjaranum í Premier League fara at hjálpa felagnum tað, ið eftir er av kappingarárinum.
Triðja felagið í London
Crystal Palace er triðja London-felagið, sum Thomas Frank stendur á odda fyri í Premier League. Hann førdi Brentford upp í bestu deildina í 2021 og fekk liðið at festa seg á miðjuni í teimum fýra kappingarárunum, sum fylgdu.
Summarið 2025 tók hann við í Tottenham. Har fekk hann 38 dystir sum venjari, áðrenn hann varð koyrdur í februar.
Crystal Palace hevur spælt í Premier League í 13 kappingarár á rað. Felagið vann FA Cup fyri fyrstu ferð í 2025 og fylgdi upp við at vinna Conference League árið eftir.
/Ritzau/