Todi Jónsson hevur fingið nýtt venjarastarv í Danmark. Í dag hevur Frederikssund IK boðað frá á heimasíðu síni, at Todi Jónsson er nýggjur venjari í felagnum, og at talan er um tvey ára sáttmála. Tað vil siga, at Todi verður venjari í Frederikssund IK fram til á sumri í 2024.
Frederikssund IK er felag í Danmarksseriuni. Frederikssund er í Norðursjællandi, og har búgva umleið 46 túsund fólk í kommununi.
Formaður í FIK er Jacob Levin Nielsen, og hann sigur við heimasíðuna hjá felagnum:
-Leiðslan og karmarnir eru teir røttu, nú ætlanin er ítróttarliga at gira upp. Tað er okkara fatan, at Todi Jónsson er rætti maðurin at menna felagið og ungu spælararnar og vinna dystir.
Martin S. Hilstrup hevur verið venjari. Hann hevur ynskt at sleppa úr venjarastarvinum og verður nú hjálparvenjari. Ein annar hjálparvenjari og málmansvenjarin halda fram í felagnum, so talan er um nógv kent fólk, sum nú fara at samstarva við Toda Jónsson.
Fyrsta venjingin verður 12. juli, og fyrsti landskappingardysturin verður 6. august á útivølli ímóti BK Skjold, sum heldur til á Eysturbrúgv í Keypmannahavn.
