Vaktin hjá Sjúkraflutningstænastuni í Vágum er aftur bert dekkað av einum starvsfólki hesa vikuna.

Tað skrivar Jóhannis Joensen, løgtingsmaður, í viðmerkingunum til ein skrivligan fyrispurning, sum hann hevur sett Eydis Hartmann Niclasen, landsstýriskvinnu í heilsu- og orkumálum.

Fyrispurningurin er dagfestur 2. oktober og snýr seg um Sjúkraflutningstænastuna í Vágum og kring landið.

Løgtingsmaðurin spyr, um landsstýriskvinnan kann tryggja, at støð 30 í Vágum framyvir verður mannað við tveimum fólkum allar dagar í árinum. Um svarið er ja, vil hann vita, hvussu hetta verður gjørt, og um landsstýriskvinnan hevur givið boð um tað.

Hann biður eisini um eina frágreiðing um manningarstøðuna hjá Sjúkraflutningstænastuni kring landið, og hvørjar aðrar avbjóðingar eru við at tryggja støðuga manning. Harumframt spyr hann, hvørji ítøkilig og varandi átøk landsstýriskvinnan ætlar at seta í verk.Í viðmerkingunum vísir Jóhannis Joensen til svarið upp á ein undanfarnan fyrispurning um sjúkraflutning. Sambært honum staðfesti landsstýriskvinnan tá, at tænastan hevur avbjóðingar við manningini, og at størsta avbjóðingin er trot á útbúnum sjúkraflutningsviðgerum.

Hann vísir á, at Sjúkraflutningstænastan ofta er fyrsta liðið í ketuni frá borgaranum til viðgerð í heilsuverkinum, tá ið álvarslig sjúka ella vanlukka rakar. Tí hevur tað stóran týdning, at tænastan virkar væl, og at fólk kunnu kenna seg trygg við, at hjálpin er tøk, sama hvar í landinum tey búgva.

Sambært løgtingsmanninum hava fólk úr øðrum pørtum av landinum eisini víst á avbjóðingar hjá tænastuni, síðan hann setti sín fyrra fyrispurning. Hetta bendir eftir hansara meting á, at trupulleikin fevnir um meira enn eina støð.

Endamálið við nýggja fyrispurninginum er bæði at fáa greiðu á, hvørji átøk kunnu bøta um støðuna í Vágum beinanvegin, og hvussu ein landsfevnandi og haldgóð sjúkraflutningstænasta kann tryggjast framyvir.