Í morgin spælir føroyska manslandsliðið annan og seinasta dystin á landsliðsferðini. Dysturin verður í Pristina í Kosovo klokkan 17.
Til venjingina vóru ábendingar um liðið. Gunnar Nielsen er ikki við og tí væntast Mattias H. Lamhauge at verða við frá byrjan. Málverjin hjá B36 hevur spælt ein landsdyst. Tað var móti Liktenstein á venjingarleguni í Pinatar í Spania.
Håkan Ericson, landsliðsvenjari, segði á tíðindafundinum undan venjignini at tað er væl hugsandi, at Bárður á Reynatrøð eisini fær kjansin í málinum. Tað kundi so verið í seinna hálvleiki.
Í verjuni eru ábendingar um, at Andrias Edmundsson fær sínar fyrstu landsliðsminuttir. Er venjingin álítandi, so verður hann væl stuðlaður av Gilla Rólantssyni, Gunnari Vatnhamar og Viljormi Davidsen.
Håkan Ericson ætlar sum skilst at royna seg við eini 4-4-2. Mitt á miðjuni verður annar debutanturin. Tað er Noah Mneney, sum skal manna miðvøllin við René Shaki Joensen, Sølva Vatnhamar í høgru og Meinhardi E. Olsen í vinstru.
Í álopinum er líkt til at Pætur Petersen fær møguleikan frá byrjan, og makkarin verður Parik Johannesen. Upplagdar útskiftingar eru Martin Agnarsson á vinstra bakki, Stefan Radosavljevic á miðjuni og møguliga Jann Benjaminsen á einum av síðunum.
Andrass Johansen hevur vant minni enn hinir á ferðini, tí hann hevur okkurt í lærkrikanum. FM1 sigur frá dystinum, sum byrjar klokkan 17.
Vit gita (4-4-2): Mattias H. Lamhauge – Gilli Rólantsson, Gunnar Vatnhamar, Andrias Edmundsson, Viljormur Davidsen – Sølvi Vatnhamar, Noah Mneney, René Shaki Joensen, Meinhard E. Olsen – Pætur Petersen, Patrik Johannesen
