Steve Witkoff, serligi sendimaðurin hjá USA, er í morgun komin til Sankta Pætursborg í Russlandi. Tað skrivar russiska ríkistíðindastovan Tass.

Har skal hann hitta russiska forsetan, Vladimir Putin, í Konstantin-høllini. Sambært Jurij Usjakov, ráðgeva hjá Putin, verður fundurin fyrrapartin.

– Samráðingar um stríðið í Ukraina eru sjálvandi høvuðsevnið á fundinum í dag, sigur Usjakov við Tass.

Konstantin-høllin varð bygd í 1700-talinum og verður í dag nýtt til almenn endamál.

Witkoff var týsdagin í Oslo, har hann hitti ukrainska forsetan, Volodymyr Zelenskyj. Amerikanski uttanríkisráðharrin, Marco Rubio, hevur lýst tann fundin sum jaligan.

– Við hesum hugskotunum kann hann nú fara til Sankta Pætursborg og leggja tey fram fyri Russlandi. So fáa vit at síggja, um vit kunnu koma nakað áleiðis, hevur Rubio sagt sambært tíðindastovuni AFP.

Jared Kushner, sum eisini er serligur amerikanskur sendimaður, væntast at luttaka á fundinum við Putin umvegis netsamband. Tað sigur ein amerikanskur embætismaður við AFP.

Aftur til Oslo eftir fundin

Eftir vitjanina í Russlandi skal Witkoff eftir ætlan aftur til Oslo. Tað sigur norski forsætisráðharrin, Jonas Gahr Støre, við NRK.

– Tað verður helst ein fundur á flogvøllinum, hugsi eg. Væntanin er, at vit fáa eina frágreiðing um fundin. Eg haldi, at vit kanska eru komin í eina støðu, har russar eisini leita eftir diplomatiskum møguleikum, sigur Støre.

Á fundinum í Oslo týsdagin vóru eisini umboð fyri Frakland, Bretland, Týskland, Pólland, ES og Nato.

Viðurskiftini millum Ukraina og USA hava verið spent, eftir at amerikanski forsetin, Donald Trump, hevur gjørt eina avtalu við Russland um diesel og hevur borið fram atfinningar móti Zelenskyj.

Eftir fundin í Oslo segði Zelenskyj, at amerikansku ávaringarnar til Ukraina um ballistisk rakettálop aftur virka.

– Tað er sera týdningarmikið fyri fólkið, tí so vita vit, nær russisku ballistisku rakettirnar koma, skrivaði ukrainski forsetin á X.

Kelda: Ritzau