AB spælir í næstbestu deildini, og fýra tey fyrstu umførini hevur tað verið eitt sindur upp og niður.
AB hevur vunnið ein dyst og spælt tveir javnar. Dysturin á heimavølli ímóti teimum næstbestu hjá EB/Streymi varð útsettur, tí tað var so nógvur vindur inni í Vika.
Í kvøld var av fagrasta veðri, tá ið AB í fyrsta umfari í kappingini um løgmanssteypið hevði vitjan av FC Suðuroy. Tað eydnaðist AB at vinna 1-0, og so er tað greitt, at AB í fjórðingsfinaluni fer at spæla ímóti besta liðnum hjá EB/Streymi. Tað verður 2. páskadag, og tað verður í Hólmanum á Eiði.
Málskjútti á Argjum í kvøld var Bartal Skaalum Petersen. Fimm minuttir undan steðginum umsetti hann brotsspark til mál. Tólv minuttir eftir steðgin var Bartal aftur í brennideplinum, tá ið hann sá beinleiðis reytt kort.
So var AB undirmannað í meiri enn ein hálvan tíma. FC Suðuroy spældi seg til onkran stóran málmøguleika, men tað eydnaðist ikki at fáa bóltin í málið aftanfyri Jesper Christian Sørensen, sum fríggjadagin verður 22 ár. Hann er dani og nýggjur málverji á Argjum. Hann hevur spælt ein landskappingardyst við AB og í kvøld spældi hann fyri fyrstu ferð í steypakappingini.
Hjá FC Suðuroy var hetta fyrsti og einasti steypadysturin í ár. Nú er fokus á landskappingini, har FC Suðuroy hósdagin vann fyrstu stigini í 1-0 heimasigrinum ímóti TB.
Seinnapartin sunnudagin fer FC Suðuroy at spæla landskappingardyst á útivølli ímóti 07 Vestur.
