Tað einasta sum ikki er spennandi í EM-undankappingarbólki E er, at Føroyar fara at enda aftast í bólkinum.
Annars hevur verið ein hørð kapprenning millum Albania, Kekkia, Moldova og Póland um at vinna seg til EM-endaspælið við at enda nummar eitt ella nummar tvey í bólkinum.
Nú er tað staðfest, at Albania sum Føroyar møta á útivølli mánakvøldið klokkan 19.45 endar millum tvey tey ovastu liðini í bólkinum, og sleppur Albania tískil at royna seg í EM-endaspælinum í Týsklandi komandi summar.
Albania megnaði javnleik 1-1 á útivølli í Chisinau í Moldova, og tað var nóg mikið hjá albanum at tryggja sær EM-luttøku. Sokol Cikalleshi legði Albania á odda við brotssparki tá 25 minuttir vóru leiktir. Heilt móti dystarenda javnaði Vladyslav Babogio til javnleik 1-1.
Albania hevur 14 stig og Moldova og Póland kunnu fáa í mesta lagi 13 stig. Tað er bert Kekkia, ið kann yvirhála Albania. Kekkia kann røkka 17 stigum við sigri á Pólandi í kvøld, og við sigri á Moldova mánakvøldið.
Støðan í bólki E beint nú er, at Albania hevur 14 stig fyri sjey dystir, Kekkia hevur 11 stig fyri seks dystir, Póland og Moldova hava 10 stig fyri sjey dystir. Aftast eru Føroyar við bert einum stigi.
